மணி தியேட்டர்/ மணி இம்பாலா/ மணி இம்பாலா மல்டிப்லெக்ஸ்

சின்ன வயசுல நான் நாலாப்பு படிக்கும் போது, திருப்பரங்குன்றம் பக்கத்துல இருக்குற ஹார்விபட்டில தான் இருந்தேன். எங்க வீட்டுக்கு பின்னாடி தான் மணி தியேட்டர். 20 பென்ச், 30 சீட், 30 சேர், பெரிய வேட்டித்துணி, ஆஸ்பெஸ்டாஸ் ஷீட் கூறை இது தான் எனக்கு மொத மொத தெரிஞ்ச மணி தியேட்டர். நெனவு தெரியாம பல படம் அதுல அதிகமா சூப்பர் ஸ்டார் படம்தான் போனாலும் என்னோட மொத தியேட்டர் அனுபவம்னு சொல்றது ”கவசம்” அப்படிங்கற படம் தான். அது வேற ஒன்னும் இல்ல ஜாக்கி சான் நடிச்ச ஆர்மர் ஆப் காட் படம் தான். எங்க கராத்தே மாஸ்டர் தான் இந்த படத்துக்குக் கூட்டிட்டு போனாரு. பென்ச்லன்னா 5 ருவா, சீட்லன்னா 10 ருவா. அந்த படத்துக்கு முன்ன வரை ஜாக்கி பத்தி எங்க மாஸ்டர் பல பில்ட் அப் குடுத்து இருந்ததாலயும், போஸ்டர் எல்லாத்துலயும் “ஜாக்கி சான் முதன் முதலில் தமிழில்” அப்படின்னு போட்டதாலயும் போனது. அப்ப டப்பிங்னு லாம் தெரியாது. பாரு ஜாக்கி என்னம்மா தமிழ் பேசுறான்னு வாயப்பொளந்துகிட்டுப் பாத்தேன். அதுக்கப்புறம் புரூஸ் லீ, அர்னால்ட்னு பல டப் பண்ணின, டப் பண்ணாத படங்கள பாக்க முடிஞ்சது அங்க தான். மாப்பிள்ளை வினாயகர், மாணிக்க வினாயகர் தியேட்டர்ல எல்லம் புது படம் வரும் இங்க அரத பழைய படம் தான் ஓடும்.

மணி இம்பாலா மல்டிப்ளெக்ஸ்

இப்படி என்னை பல ஹாலிவுட் படங்கள பாக்க வெச்ச தியேட்டர திடீர்னு மூடிட்டாங்க. இம்பாலா ஹோட்டல்காரவுங்க அந்த தியேட்டர வாங்கினாங்க நெறைய மாற்றம்லாம் செஞ்சு மணி இம்பாலானு பேர மாத்தினாங்க. டிக்கெட் காசு கூடிச்சு, புது படமும் வந்துச்சு. அதுக்கப்புறம் புது படம் பாக்கணும்னு ரொம்ப தொலவு போக வேண்டிய பிரச்சனை இல்லை. முன்ன விட தியேட்டர் நல்லாவே இருந்துச்சு. புது தியேட்டர்ல எதோ தமிழ் படம்தான் பாத்த நியாபகம். முன்னெல்லாம் படம் ஆரம்பிக்கிறதுக்கு பத்து நிமிஷம் முன்ன போனா போதும் ஆன மணி இம்பாலா ஆனதும் வெள்ளென போனா தான் டிக்கெட் கெடைக்குற நெலைமை. இருந்தாலும் வெள்ளென போய் டிக்கெட் வாங்குறதும் சொகமாத் தான் இருந்துச்சு. 

பழைய டிக்கெட் கவுன்டர் மற்றும் புதிய டிக்கெட் கவுன்டர்

அதுக்கப்புறம் நான் காலேஜ் படிக்க சென்னை வந்ததும் திரும்ப மூடிட்டதா கேள்வி பட்டேன், ஏன் எதுக்குன்னு தெரியல அப்புறம் தான் தெரிஞ்சது மணி இம்பாலா இனிமேல் மணி இம்பாலா மல்டிப்ளெக்ஸ்னு. அந்த ஒரே கட்டடத்துல மூணு தியேட்டர். அதுல நான் பாத்த முதல் படம் தசாவதாரம்னு நெனக்குறேன். அதுவும் தியேட்டர்ல எங்க தல ஹிமேஷ் ரேஷம்மியாவுக்கெல்லாம் கட் அவுட் வெச்சதால தான் நியாபகம் இருக்கு. காலத்துக்கு ஏத்த மாதிரி மாத்தினதால தான் இன்னும் அந்த தியேட்டர் ஓடுது. இப்ப மாணிக்க வினாயகர், மாப்பிள்ளை வினாயகர் இல்லாத குறைய தீர்க்குது. என்னதான் மால்ல இருக்குற தியேட்டர் இருந்தாலும் இந்த மாதிரி தனி தியேட்டர் குடுக்குற சுகம் படம் பாத்துட்டு வெளிய வந்து கட் அவுட்ட பாக்குறவனுக்கு மட்டுமே புரியும்.

80-20 மூவீஸ் கார்ப்பின் சார்பாக சினிமா தியேட்டர் தினம் கொண்டாடும் நோக்கில் என் சார்பாக என் வாழ்வில் மறக்க முடியாத தியேட்டரை பற்றி எழுதியுள்ளேன். சினிமா தியேட்டர் தினம் பற்றி மேலும் அறிய www.cinematheaterday.in என்னும் இணையதளம் செல்லவும்.

மதுரை முதல் சென்னை வரை

ஒரு ரெண்டு நாளைக்கு முன்னால மதுரைக்கு போயிருந்தேன். திடீர் வேலை அப்படீங்கறதால முன்பதிவுலம் எதுவும் பண்ணாம கெடச்ச பஸ்ல போய்ட்டேன். வரும்போது சென்னை பஸ் கூட்டம் இல்லாம கெடச்சத இன்னும் என்னால நம்ப முடியல. பஸ்ல ஏறினா ஒரு அரை மணி நேரம் கூட்டம் சேர்க்க வண்டிய போட்டுடாரு நம்ம ஓட்டுனர். அந்த நேரம் அந்த புண்ணியவான் ரேடியோவுல Beatles பாட்டு ஓட விட்டாரு. என்னடா S.E.T.C வண்டில இந்த பாட்டான்னு ஒரே இன்ப அதிர்ச்சி. நம்ம அரசும் சரி, அது சார்ந்த எல்லா நிறுவனமும் சரி இந்த மாதிரி இன்ப அதிர்ச்சிய கொஞ்ச நேரம் தான் தருவாங்க, அப்புறம் அந்த இன்பத்த தூக்கிட்டு அதிர்ச்சி மட்டும் தான் தருவாங்க.

பஸ் கெளம்புனதும் M.S.V ஹிட்ஸ் ஓட ஆரம்பிச்சுருச்சு. அதுவும் முழுசும் சிவாஜி பாட்டு. சில பல பாட்டு எனக்கும் பிடிச்சதுதான்னாலும் பலது மொக்கை தான். ஆனா அந்த நல்லவர் அப்படியே மொக்கை பாட்டா போட்டுருந்தா கூட நான் தூங்கி இருப்பேன், திடீர்னு “பாட்டும் பரதமும்” படத்துல இருந்து அழகுக் கூந்தல் பாட்டை போட்டாரு. மயான அமைதியில வெறும் இஞ்சின் சத்தமும், T.M.S குரலும்னு போய்ட்டு இருந்த நேரத்துல இந்த பாட்டை போட்டதும் என்னையும் மறந்து சிரிக்க ஆரம்பிச்சுட்டேன். அதுவும் நான் இருந்தது ஓட்டுனர்/நடத்துனர் சீட்டு பக்கத்துல. சிரிப்புச் சத்தம் கொஞ்சம் அதிகமானதால ஒரு மூணு சீட்டு வரைக்கும் உள்ள மக்கள் என்னை எதோ பைத்தியம் மாதிரியே பாத்தங்க. நான் சிரிச்ச காரணம் அந்த பாட்டுல சிவாஜியோட நடனம் மற்றும் லிப் ஸின்க். அதை நீங்களே பாத்துக்கோங்க. இத பாத்ததும் அடுத்த வாட்டி இந்த பாட்டை கேட்ட நீங்களும் சிரிப்பீங்க.

கொஞ்ச நேரத்துல எல்லாம் அடங்கி வழக்கமா ஓடிச்சு. மேலூர் பக்கம் சந்திரன் வந்த பின்னரும் சூரியனின் மகிமை பற்றி கூட்டம் நடந்துட்டு இருந்துச்சு. அதால வண்டியை ஊரு முழுக்க சுத்த விட்டுட்டாங்க. இதனால ஓட்டுனருக்கு செம கடுப்பு போல, மேலூர் தாண்டினதும் புரட்சி தலைவர் பாட்டா ஓடிச்சு. அவ்வளவு வண்டிச் சத்ததுலயும் ஒரு நாலு பேரு கூட பாடினது எனக்கே கேட்டுச்சு. இப்படியே கொஞ்ச ரொம்ப நேரம் போனதும் வண்டிய ஒரு டீக்கடை பக்கம் ஓரம் கட்டினாரு. லைட் எல்லாத்தயும் போட்டுட்டு ஓட்டுனர் பயணிகளை எல்லாம் பார்க்கும்போது தன்னால என் காதுல “செய்வீர்களா, நீங்கள் செய்வீர்களா?”னு கேட்டுச்சு. 

அதுக்கப்புறம் ஜெமினி பாட்டு போட்டாரு, பத்தே நிமிஷம் தான் அடுத்து தாம்பரம் வந்தது தான் தெரியும்.  

டிஸ்கி 1: இதனை நான் முகநூலில் நிலைத்தகவாக இட்டிருந்தாலும் என் வாசகர் மார்க் அதனை எப்போது அழிப்பார் என்று அறியேன், ஆதலால் தான் இந்த பதிவு.

டிஸ்கி  2:  இந்த அருமையான பாட்டை நான் கேட்கும் பாக்கியத்தைக் கொடுத்த பிரபல இசை விமர்சகர், பதிவர், பறவை ஆர்வலர் மற்றும் இன்ன பல முகம் கொண்ட கொழந்த அவர்களுக்கு நன்றி.